Tamilnadu Science Forum, Salem. தமிழ்நாடு அறிவியல் இயக்கம், சேலம்.

வேறு கோள்களில் உங்களின் வயது?

2012-02-13T00:40:00.000+05:30

ஒரு நாளைக்கு எத்தனை மணி நேரம்?

அக்காமாருங்களே , அண்ணாச்சிகளே, ஒக்காருங்க. ஒங்களுக்கு ஒரு கதை சொல்ல வந்திருக்கேன்.

அது என்னா கதை.. நாங்க என்னா பச்சப் புள்ளையா?

அண்ணே, கதை யாரு வேணா கேக்கலாம்.இப்ப நான் சொல்லப்போற கதையே வேற..!

அப்படி என்னா ஊருல ஒலகத்திலே இல்லாத கதை சொல்லப்போற..!

ஊரு ஒலகத்திலே இல்லாத கதைதான்க்கா..அது சரி . ஒங்க ஊரல ஒரு நாளைக்கு எத்தனை மணி நேரம்?

இது என்னாப்பா கேள்வி.?இது தெரியாம மனுசரு உண்டா?

அதெல்லாம் சரி அண்ணாச்சி. பதிலைச் சொல்லுங்க?

எங்க ஊருல மட்டும் இல்லேப்பா,.. இந்த உலகத்துலே எந்த மூலைக்கு நீ போனாலும் ஒரு நாளைக்கு இருவத்தி நாலு மணி நேரம்தாம்பா..!

எப்பவும்தானா அண்ணாச்சி..! எல்லா உலகத்திலேயும், கோளிலேயுமா?

ஆமாப்பா.. எங்க தாத்தன் பூட்டன் காலத்திலேருந்து இதேதாம்பா கதை..!

அண்ணாச்சி.. இப்ப நான் கதைய மாத்தி சொல்லப்போறேன்..!

என்னடாது இது புதுக் கதை உடறே..!

புதுக்கதை இல்லக்கா, பழைய கதைதான், ஆனா பொதுவா யாருக்கும் தெரியாத கதை..!

அப்படியா சொல்லு சொல்லு.ஏதோ கொஞ்சம் நேரம் போவும்.!

அக்கா, நல்லா கேட்டுக்குங்க உங்க புள்ளங்களுக்கும் போயி சொல்லுங்க.பழைய கதையோட . புதுக்கதையும் சொல்றேன்..! அதான் நடந்த கதை,நடக்கிற கதை, நடக்கப்போற கதை எல்லாம் சொல்லப்போறேன்..!

கதை கேளு, கதை கேளு, ஒரு நாளின் கதை கேளு..

இப்ப நம்ம பூமியிலே ஒரு நாள் என்பது 24 மணி நேரம்தான். ஆனால் நம் சூரிய குடும்பத்தில் உள்ள கோள்களில் ஒவ்வொன்றின் ஒரு நாள் நேரமும் வேறு வேறாக இருக்கிறது.

அப்படியா சங்கதி..சரி அதையும் சொல்லு கண்ணு.? புதன் கிரகத்துலே ஒரு நாள் எத்தினி மணி நேரம்?

புதன் சூரியனுக்கு ரொம்ப பக்கத்திலே இருக்குது.. அதனால அதன் மேல் சூரியனின் ஈர்ப்பு சக்தி அதிகம் தெரியும். புதன் கோள் ஒருமுறை தன்னைத்தானே சுற்றி முடிக்க..நம்ம பூமி நேரப்படி175.94நாட்கள் 59 மணி நேரம் ஆகிறது. அதுதான் புதனின் ஒரு நாள் ஆகும். எந்த கோளாக இருந்தாலும் சரி தன் அச்சில் ஒருமுறை தன்னைத்தானே சுற்றிக்கொள்ள எடுத்துக்கொள்ளும் நேரமே, அந்த கோளின் ஒரு நாள் எனப்படுகிறது.

சரி..சரி கண்ணு இப்பத்தானே வெளக்கமா புரியுது.புதனோட நாள் சொல்லிட்டே. செவ்வாய், வியாழன், வெள்ளி,சனியோட ஒரு நாள் நேரம் என்னாப்பா?

சூரிய குடும்பத்திலே, ரெண்டாவதா சுற்றுகிற, நம் பூமிக்கு முன்னாடி இருக்குற வெள்ளி கோளின் ஒரு நாள் என்பது நமக்கு 243 நாட்கள் ஆகும்.

இது என்னடாது, ஒரு நாளைக்கு எத்தினி மணி நேரம்னு கேட்டா, நீ வருஷத்துக்கு சொல்றியேப்பா?

இல்லேண்ணே, நான் சொல்றது ஒரு நாள்தான். வெள்ளி கோளோட ஒரு வருஷமும், ஒரு நாளும் கிட்டததட்ட ஒண்ணு தான். வெள்ளி கோளில் ஒரு வருடம் என்பது, ஒரு முறை வெள்ளி சூரியனை சுற்ற எடுத்துக்கொள்ளும் காலம், 224.70 நாட்கள் . இதுதான் வெள்ளிக்கோளின் ஓர் ஆண்டு. ஆனால் அது தன் அச்சில் மிக மிக மெதுவாக சுற்றுவதால் தன் அச்சில் ஒரு முறை சுற்றி முடிக்கவே, கிட்டததட்ட ஒரு வருடத்தை நெருங்கி வந்துவிடுகிறது. நம்ம பூமியோட 243 நாள்தான் வெள்ளி கோளில் ஒரு நாள்.அது ஒரு தடவை தன்னோட அச்சிலே சுத்திமுடிக்க 243 நாள் ஆவுது. ஆனால் ஒருசூரிய உதயத்துக்கும் அடுத்த சூரிய உதயத்துக்கும் இடைப்பட்ட நாட்கள் 116.75 பூமி நாட்கள்.தெரியுதா அண்ணாச்சி.

என்னமோ போ, எங்களுக்கென்னா தெரியும், நீ படிச்சவன் சொல்றே. நாங்களும் நம்பிக்கிறோம்.

என்னண்னே இப்புடி சொல்லிட்டீங்க. நான் சொல்றது நெசம் ண்ணே ..!

சரி, சரி மேல சொல்லுப்பா.. கேக்க சுவாரசியமாத்தான் இருக்கு.

அடுத்து நம்ம பூமியோட ஒரு நாள் எனபது சரியா துல்லியமா 24 மணி நேரம் இல்லே. 23 மணி 56 நிமிடம் 4.1 நொடிகள் தான். நம் பூமியின் துணைக்கோளான சந்திரனின் ஒரு நாள் என்பது நமக்கு 29.53 நாட்கள் .அதோட ஒரு வருடம் என்பது

அப்ப நீ ஒரு மாசம்தான் சந்திரனோட ஒரு நாள்னு சொல்றியா?

ஆமாண்ணே..சந்திரன் ஒரு தடவை சுற்றி முடிக்க 29நாள்தான் ஆவுது. அப்படின்னா அதோட ஒரு வருடம் என்பது அதுக்கு 12 நாள்தான்..

ஹும்.. .. நமக்கெல்லாம் இது தெரியாம போச்சே..! நம்ம கணக்குக்கு ஒரு மாசம்னு சொல்றோம்.

அக்கா.. செவ்வாயின் ஒரு நாள் கிட்டததட்ட நாமள மாதிரிதான்.

24 மணி நேரமா?

ஆமா..செவ்வாயின் ஒரு நாள், 24 மணி 37 நிமிடம் 22.66 நொடிகள் தான். செவ்வாயோட சுற்று வேகமும், பூமியோட சுற்று வேகமும் சராசரியா ஒண்ணுதான்.

சரிப்பா, நமக்கு ரொம்ப தொலைவிலே இருக்குற வியாழன், சனிக் கதை என்னா?

வியாழன்தான் நம்ம சூரிய குடும்பத்திலே பெரிய அண்ணாச்சி.அதோ போல வெகு வேகமா சுத்தறதும் அதுதான். அதோட ஒரு நாள் என்பது நமக்கு 9 மணி 55 நிமிடம் 33 நொடிகள்.இதிலே இன்னொரு விஷயமும் சொல்றேன். இந்த வியாழன் நம்ம பூமியைவிட

317 . 5 மடங்கு அதிக நிறை உள்ளது. பூமியில் மட்டும்தான் எடை என்று குறிப்பிடு கிறோம். எடை என்பது ஈர்ப்பு விவசைக்கு தகுந்தாற்போல மாறும். எனவேதான் பூமியைத்தவிர மற்ற கோள், சூரியனில் எல்லாம் நிறை என்றே சொல்லவேண்டும்

.ஆனால் சூரிய குடும்பத்தில் அதிக வேகத்தில் தன்னைத்தானே சுற்றிக்கொள்ளும் கோள் இது மட்டுமே.

அப்ப 10 மணி நேரம்தான் வியாழனோட ஒரு நாள்.

ஆமாண்ணே..சனிக்கோ ளின் ஒரு நாள்10 மணி 32 நிமிடம் 36 நொடிகள்.

சுமார் 10 .5 மணி நேரம்.இல்லியா?

ஆமாம். சனிக்கு அப்பாலே இருக்குற யுரேனஸ் கோளின் ஒரு நாள் என்பது 17 மணி 14 நிமிடம் 23 நொடிகள். சரியா சொன்ன நெப்டியூனின் ஒரு நாளுக்கும் கிட்டத்தட்ட அதே நேரம்தான் 16 மணி 6.6 நிமிடம் .

போதும்பா ஒரே குழப்பமா இருக்கு.. நீயே வந்து புள்ளங்களுக்கு சொல்லிக் கொடு.

அண்ணாச்சி இதுக்கே அசந்துட்டா எப்படி..இன்னும் கதை இருக்கே..!

ம்..ம்.. சொல்லு . சொல்லு.

அண்ணே அதுக்கு முன்னே, இன்னொரு இண்டரஸ்ட்டான ஒரு விஷயம் சொல்றேன்.

என்னப்பா நெனச்சி நெனச்சி புதிர் போடறே

வேறு கோள்களில் உங்களின் வயது?

ஆமாக்கா, புதிர்தான். ! ஆனா அது இந்த கோள்களின் ஒரு நாள் நேரத்தோடவும், ஒரு வருஷ காலத்தோடவும் சம்பந்தப்பட்டது. இப்ப உங்க மகனுக்கோ/மகளுக்கோ நேத்திக்குத்தான் பொறந்த நாளுன்னு வெச்சிக்குவோம்.

என்ன 11 .02 .2012 ஆ..? எனக்கு அவ்வளவு சின்ன புள்ளே இல்லியேப்பா?

அத விடுண்ணே..அந்த தேதியிலே பொறந்த உங்க புள்ளைக்கு இப்ப 22 வயசு..உங்கள பிள்ளையோட பிறந்த நாள் 11 .02 .1990 ன்னு வெச்சிக்கலாம்.

சரி அதுக்கென்ன இப்ப

இருக்குதே விஷயம் இருக்குதேண்ணே. அவங்களுக்கு நம்ம சூரிய குடும்பத்தோட வேற கோள்லே இருந்த எத்தினி வயசு ஆகும் தெரியுமா?

அதையும் நீயே சொல்லு..

ம்..நல்ல கேட்டுக்குங்க .. இப்ப உங்க புள்ளைக்கு, இங்க 22 வயசுன்னா.. புதன் கோள்லே 91 .3 வருஷம் ஆகும். ஆனால் அடுத்த பொறந்த நாள், திங்கள் கிழமை, செப்டம்பர் 9, 2012 தான் வரும். அதே போல் வெள்ளியிலே, 35 .7 வயசு, அடுத்த் பொறந்த நாள் 2012 , ஏப்ரல் 5 , வியாழக்கிழமை வரும். ஆனால் பூமியிலே, அடுத்த பொறந்த நாள் 2013 , பிப்ரவரி 10 , ஞாயிறு அன்னிக்கு வரும். இந்த ஆண்டு லீப் வருஷம் .

கேக்க நல்லாத்தான் இருக்கு, செவ்வாய்லே எத்தினி வயசு இருக்கும்.

செவ்வாயில் வயது 11 .6 . அடுத்த் பொறந்த நாள் தேதி..வியாழன் செப்டம்பர் , 6, 2012 . ஆனால் வியாழனில் உங்க பிள்ளை குழந்தைதான். வயது 1 .85 .அப்படின்னா குழந்தைதானே .அடுத்து வரும் பிறந்த தேதிசனிக்கிழமை, நவம்பர். 2, 2013 தான்.

நெசம்மாவே எங்களுக்கு கைக்குழந்த இருக்குற மாதிரி பண்ணிட்டே.

நான் செய்யலேன்னே.. நீங்க வேற உலகத்திலே இருந்தீங்கன்னா இப்படி இருக்கும்னு சொல்றேன்.

அப்பாலே இருக்குற சனிக்கெரகத்திலே என்னா வயசு.

அண்ணே, புள்ளைக்கு ஒரு வயசு கூட ஆயிருக்காது?

என்னாப்பா

ஆமாண்ணே, இப்ப நம்ம பூமியிலே பொறந்த புள்ளைக்கு 22 வயசுன்னா, அது சனிக்கோள் லே பொறந்திருந்தா, அதுக்கு 0.74 வருஷம் தான் ஆகி இருக்கும். அடுத்த , பொறந்த நாள் ஞாயிறு,ஜுலை 28, 2019 லே வரும்.

எல்லாம் ஒரே ஆச்சரியமா இருக்கேப்பா?

ஆமாக்கா. இன்னும் தொலைவிலே இருக்கிற யுரேனஸ் லே பூமியின் 22 வயது இளைஞருக்கு , வெறும் 0.26 வருடம்தான் ஆகும். அடுத்த் பிறந்த நாள்,2074 , பிப்ரவரி 15 ல், வியாழன் அன்று நிகழும். அப்புறம் இன்னொரு விஷயம் சொன்னா நீங்க நம்பவே மாட்டீங்க.

அதையும் சொல்லு.. எத நம்ப, எத நம்ப வேண்டாம்னு தெரியலே.. எல்லாமே ஒரே ஆச்சரியமா இருக்கு?

அண்ணே, நமது எட்டாவது கோள் லே நம்ம புள்ளே ௨௨ வருஷத்துக்கு முன்னானி பொறந்து இருந்துச்சுன்னு வச்சிகிட்டா, இப்ப அதுக்கு வயசு 0.13 வருடம்தான். ஆனால் அடுத்த பொறந்த நாள் 2154ல் தான். இன்னும் 152 வருடம் கழிச்சுத்தான்.அந்த வருடம் நவம்பர் 28 ல், வியாழக்கிழமை வரும். அப்புறமா, நம்ம சூரிய குடும்பத்தோட கோள் இல்லேன்னு வெலக்கி வச்சாங்களே, அந்த புளூட்டோவுலே புள்ள இருந்தா அதுக்கு, அங்க .00 88 புளூட்டோனியன் ஆண்டுகள் ஆகி இருக்கும். அடுத்த பிறந்த நாள் எப்ப வரும் தெரியுமா,நீங்க அதுவரை உயிரோட இருந்தா 2238 ம் ஆண்டு, செப்டம்பர் 19, புதன் கிழமை வரும்..

சரி கண்ணு நெறைய விஷயம் சொல்லிட்டே.. நாளைக்கு வந்து புள்ளைங்க கிட்டே இல்லே.

ஆமாம் இதெல்லாம் எப்புடிப்பா..

மூலவர்களான, டைகோ பிராகியும், கெப்ளரும் ..

அண்ணே, ஒவ்வொரு கோள் லேயும், ஓர் ஆண்டு என்பது அதனோட சுற்று வேகத்தையும், அது எத்தனை நாட்களில் நம்ம சூரியனை சுற்றி வருகிறது என்பதையும் பொறுத்தது. இதெல்லாம் நான் சொல்லலே. 500 ஆண்டுகளுக்கு முன்பு வாழ்ந்த டைகோ பிராகியும், அவரின் உதவியுடன், ஜொகான்னஸ் கெப்ளரும் (1571 -1630), கணித சூத்திரங்கள் மூலம் சரியாகக் கண்டறிந்தனர். இதெல்லாம் மிக மிக வியப்பான தகவல்கள்தானே.

சரிப்பா. எவ்வளோ விஷயம் சொல்லி இருக்கிறே.. நல்லா இருப்பா. நாளைக்கு மறக்காம வாப்பா.

அண்ணே நான் நாளைக்கி வர்றேன். இந்த விஷயத்தோட, இனறைய நாளின் கதையும் சொல்றேன்.

-பேரா.சோ.மோகனா

நன்றி : http://tnsftheni.blogspot.in/

சூரிய ஆற்றல் தரப்போகும் 20,000 மெகாவாட் மின்சாரம்

2012-01-26T23:09:00.002+05:30

சூரிய ஆற்றல் சுற்றுப்புறத்திற்கு எந்தக் கேட்டினையும் விளைவிக்காத சுத்தமான ஆற்றல்.

வடமேற்கு இந்தியாவில் 63 ஏக்கர் நிலத்தில் 36,000 சூரியத் தகடுகளை வைத்து மின்சாரம் உற்பத்தி செய்யும் மிகப்பெரும் திட்டத்தை அசூர் பவர் என்ற நிறுவனம் நிறைவேற்றி வருகிறது. வறண்ட பகுதியில் தகடுகள் நிறுவப்பட்டுள்ளதால் ஐந்து நாட்களுக்கொரு முறை அவற்றின் மீது படியும் தூசுகளைத் துடைத்து சுத்தப்படுத்த வேண்டியுள்ளது. கடுமையான மின்பற்றாக்குறை நிலவும் இந்தியாவில் சூரியசக்தி மூலம் மின்சாரம் தயாரிப்பதை நவீனப் படுத்தி, நிலக்கரியைப் பயன் படுத்தித் தயாரிக்கப்படும் மின் சாரத்தின் அளவைப் படிப்படியாகக் குறைப்பதுதான் திட்டத்தின் நோக்கம்.

2020-க்குள் 2000 மெகாவாட்

இதுவரை 140 மெகாவாட் சூரியசக்தி மின்சாரத்தை மட்டுமே இந்தியா பயன்படுத்தி வருகிறது. இதைக் கொண்டு 50,000 மக்கள் தொகை உள்ள ஒரு நகரத்தின் மின்தேவைகளை நிறைவேற்றிக் கொள்ள முடியும். இரண்டு ஆண்டுகளுக்கு முன் இந்தியாவில் தயாரிக்கப்படும் சூரிய ஆற்றல் மின்சாரத்தின் அளவு சொல்லிக் கொள்ளும் படியாக இல்லை. 2020-க்குள் இந்த அளவை 20,000 மெகா வாட் ஆக உயர்த்த வேண்டும் என்ற இலக்கினை அப்போது இந்திய அரசு நிர்ணயித்தது. பல ஆய்வாளர்கள் இந்த இலக் கினை எட்டுவது சாத்தியமல்ல என்று கருதினர். ஆனால் இன்று அவர்கள் தங்கள் கருத்தினை மாற்றிக் கொள்ள வேண்டிய நிலை தோன்றியிருக்கிறது. 2020க்கு சில ஆண்டுகள் முன்ன தாகவே 20,000 மெகாவாட் இலக்கை எட்டிவிட முடியும் என தற்போது ஆய்வாளர்கள் தெரிவிக்கின்றனர். உலக அள வில் சூரியத் தகடுகளின் விலை குறைந்ததால்தான் இது சாத்திய மாகியிருக்கிறது. சன்டெக் பவர், யிங்க்லி கிரீன் எனர்ஜி போன்ற சீன நிறுவனங்கள் சூரியத் தகடு களின் உற்பத்தியை அதிகரித்த தால், உலக விலை 30-லிருந்து 40 சதம் வரை குறைந்தது. சீனா, அமெரிக்கா, தைவான், ஐரோப் பிய நாடுகளிலிருந்து இந்திய நிறு வனங்கள் தகடுகளை வர வழைத் துக் கொள்கின்றன. அரசு மானி யம் கொடுத்து ஊக்குவிப்ப தாலும் சூரியத் தகடுகளின் விலை குறைந்திருப்பதாலும் அசூர் போன்ற பல நிறுவனங்கள் இன்று வடமேற்கு இந்தியச் சமவெளிகளில் களம் இறங்கி யுள்ளன. 2000 பேர் வசிக்கும் சிறு கிராமங்களில் கூட சூரிய சக்தித் தகடுகள் மின்னும் காட் சியைப் பார்க்க முடிகிறது.

சூரியசக்தி மின்தயாரிப்பில் ஐரோப்பிய நாடுகளோடு ஒப் பிடும்போது இந்தியா பின்தங் கியே இருக்கிறது. உதாரணமாக, 2010 இறுதியில் ஜெர்மனி 17,000 மெகாவாட் சூரியசக்தி மின் சாரத்தை உற்பத்தி செய்யும் திற னுடன் இருந்தது. ஒரு வருடத் தில் 300 நாட்களில் சூரிய ஒளி தாராளமாகக் கிடைக்கும் நம் நாட்டில் அதைவிட அதிகமாக சூரியசக்தி மின்சாரத்தைத் தயாரிக்க முடியும்.

தயாரிப்புச் செலவு குறையும்

“இந்தியாவில் உள்ள மின் ஆலைகளில் பெரும்பாலானவை நிலக்கரியைப் பயன்படுத்தி மின்சாரம் தயாரிக்கும் அனல் மின் நிலையங்களே. அங்கு ஒரு யூனிட்டிற்கு 4 ரூபாய் செலவில் மின்சாரம் தயாரிக் கப்படுகிறது. ஏலத்தில் அது 8-லிருந்து 10 ரூபாய் வரை எடுக்கப்படுகிறது. தொழில் நிறுவனங்களும் வணிக நிறுவனங்களும் ஒரு யூனிட் மின்சாரத்திற்குக் கொடுக்கும் விலையும் அதுதான். பெட்ரோலியப் பொருட்களைப் பயன்படுத்தும் ஜெனரேட்டர் கள் ஒரு யூனிட் மின்சாரம் தயாரிக்க 10 ரூபாய் செலவா கிறது. தற்போது சூரிய சக்தி மின்சாரம் தயாரிக்கும் செலவு இதோடு ஒப்பிடும் நிலையில் உள்ளது. சூரிய ஆற்றல் மூலம் மின்சாரம் தயாரிப்பதற்கான தேவை அதிகரித்து வருவதால், ஒவ்வொரு மாதமும் சூரியசக்தி மின்சாரத்தின் உற்பத்திச் செலவு குறைந்து கொண்டே வருகிறது. இன்னும் சில ஆண்டுகளில் மற்ற வகைகளில் தயாரிக்கப்படும் மின்சாரத்திற்கு ஆகும் செலவிலேயே சூரியசக்தி மின்சாரத்தையும் தயாரிக்க முடியும். தொடக் கத்தில் நிறுவனங்களிடையே கடுமையான போட்டி இருக் கிறது. ஆனால் நாளாவட்டத் தில் கொள்ளை லாபமே நோக்க மாகக் கொண்ட நிறுவனங்கள் காணாமல் போய்விடும். இத் துறையில் உண்மையான ஈடு பாடு உள்ள நிறுவனங்கள் மட்டுமே நிலைத்து நிற்கும்” என்கிறார் அசூர் பவர் தலைமை மேலாளர் இன்டர்ப்ரீட் வாத்வா.

பேராசிரியர் கே. ராஜு

(உதவிய கட்டுரை : ‘தி இந்து’வில் விகாஸ் பஜாஜ் எழுதியது)

நன்றி : http://cerdpsf.blogspot.com/

2012-01-13T09:41:00.002+05:30

புகையில்லா போகி கொண்டாடுவோம்.

Ø பழையன கழிதலும் புதியன புகுதலும், வழிவழி வந்தவையாம் என்ற பொருளுக்கேற்ப நாமும் போகிப் பண்டிகையை கொண்டாடுவோம்.

Ø பழயன கழிதல் என்பது மாற்றம் என்பதுதான், அதாவது அவற்றின் பயன்பாட்டையோ தோற்றத்தையோ மாற்றி அமைப்பதுதான். அவற்றை எரிப்பதென்பாகாது.

Ø ஆனால் தற்போது நாமும் கூட பிளாஸ்டிக், டயர், ரப்பர் என எரித்து கிராமிய மணத்தை மூழ்கடித்து நகரத்துக்கு ஈடாக பூமி சூடாக காரணமாகின்றோம்.

Ø நீண்ட நேரம் எரியும் இவைகளினால் நச்சு வாயுக்கள் வெளிப்பட்டு சுற்று சூழல் கெட்டு பலவித இன்னல்களாக அதாவது சுனாமி, பூகம்பம், தற்போது ஏற்பட்ட தானே புயல் போன்றவை ஏற்படுகிறது.

Ø உலக சுகாதார நிறுவனம் அறிவித்துள்ள புள்ளிவிவரத்தில் தற்போது புகையால் ஆண்டுதோறும் 3.3 பில்லியன் மக்க்கள் இறந்து வருகின்றனர். நம் நாட்டில் இப் புகையால் 12,000 குழந்தைகள் குறை பிரசவத்தில் பிறக்கின்றனர், 15,000 பேர் இதய நோயால் இறக்கின்றனர், 6000 பேர் ஆஸ்த்துமா, 8,900 பேர் மூச்சு சுவாசம், 3800 பேர் கருவிலேயே இறப்பு என தொடரும் துயரத்திற்கு நாம் காரணமாகலாமா?

Ø வாகனங்கள் வெளியிடும் கார்பன் மோனாக்சைடு,தொழிற்
சாலைகள் வெளியிடும் சல்ஃபர் டைஆக்சைடு, நவின விவசாயத்தில் பயன்படுத்தப்படும் செயற்கை உரங்களினால் ஏற்படும் அம்மோனியா, அழகு சாதனப்பொருகளில் உள்ள குளோரொ ஃப்புளோரோ கார்பன் போன்றவை நம்மை காக்கும் ஓசோன் படலத்தை சேதமாக்கும் போது இவைகளுக்கு ஈடாக நாமும் குப்பைகளை எரித்து பூமியை சூடாக்குவதுடன் நோய்களுக்கு ஆளாக வேண்டுமா?

Ø எரித்தல் என்பன வற்றிற்கு பதிலாக நாம் புதைத்தல் என்பதை நவீன அறிவியல் உலகத்தில் கடைபிடிப்போம், ஒருவருக்கு பல செருப்புகள் என்பவற்றிற்கு பதிலாக ஒரு செருப்பு என பயன்பாட்டை குறைத்தல், கிழிந்த பெட்ஷீட்டை டவலாக பயன்படுத்துதல் என்ற மறுபயன்பாடு, பிளாஸ்டிக் பொம்மை போன்றவற்றை சேகரித்து வைத்து கடைகார்ர்களிடம் கொடுத்து மறுசுழற்சி ஏற்படுத்துதல், மட்கக்கூடிய குப்பைகளை மட்க வைத்து இயற்கை உரமாக்கள் என்ற திரும்பப்பெறல் முறைகளை பயன்படுத்துவோம். (Reduce, Reuse, Recyle, Recover )

வாடிய பயிரைக் கண்ட போதெல்லாம் வாடினேன் – வள்ளளார்

எல்லா உயிர்களும் என்புற்று இருப்பதே யல்லாமல்

வேறொன்றும் வேண்டேன் பராபரமே - தாயுமானவர்

போன்ற ஆன்றோர்களின் கருத்துக்களுக்கேற்ப இன்றும் நாம் பழைய கருத்துக்களை நினைவு கூர்ந்து

இந்த உலகம் இனியது, எங்கள் வாழ்வும் இனியது

எல்லோருக்கும் நல்ல நீரும் நல்ல காற்றும் உரியது

என்ற அறிவியல் பாடலுக்கேற்ப சுற்று சூழலை பாதிக்கும் புகையைத் தவிர்த்து புகையில்லா போகி கொண்டாடுவோம்.

மக்கள் நலன் கருதி வெளியிடுவோர்:

நன்றி :

தமிழ்நாடு அறிவியல் இயக்கம்

காஞ்சிபுரம் மாவட்டம்
Munusamy G munustnsf@gmail.com

_________________________
I added cool smileys to this message... if you don't see them go to: http://s.exps.me

குழந்தைகளின் கல்விக்கு வெறும் 1 விழுக்காடுதானா?

2012-01-11T23:08:00.000+05:30

குழந்தைகளின் அடிப்படைக் கல்வி, உலக அவையத்து இந்தியா முந்தியிருக்க மிக மிக முக்கியத் தேவை. ஆனால், இந்தியாவில் மிகவும் பிந்தியிருப்பது குழந்தைகளின் கல்விக்கு அளிக் கப்படும் முக்கியத்துவம்தான். இந்தியாவின் மொத்த உள்நாட்டு உற்பத்தியில் கல்விக்காக ஒதுக்கப்படும் அரசு செலவினம் ஒருபோதும் அதிகபட்சமாக 4.3 விழுக்காட்டிற்கு மேல் உயர்ந்ததில்லை. இது உயர்கல்வி உள்ளிட்ட அனைத்துத்துறைகளுக்குமான மொத்தத் தொகை. அடிப்படையான தொடக்கக்கல்விக் கான நிதி மிகமிகக் குறைவு.

இந்தப் பின்னணியில் குழந்தைகளின் கல் விக்காக என மத்திய-மாநில அரசுகள் ஒதுக்கு கிற நிதியிலும் கூட, நேரடியாக அவர்களுடைய கல்விக்கு என ஒதுக்கப்படுவது வெறும் 6 விழுக் காடுதான் என்று அண்மையில் மேற்கொள்ளப் பட்ட ஒரு ஆய்வு தெரிவிக்கிறது. பாடப்புத்தகங் கள், சீருடைகள், பள்ளியிலிருந்து பாதியில் விலகுகிற குழந்தைகளின் பிரச்சனைகள் இவற் றுக்காக ஒதுக்கப்படுகிற நிதி ஏற்பாடுகள் அந்த 6 விழுக்காட்டிற்குள் அடங்குகிறது. 78 விழுக் காடு வரையில் ஆசிரியர்களின் ஊதியத்திற்கும், 14 விழுக்காடு நிதி பள்ளிகளின் உள்கட்டுமான செலவுகளுக்காகவும் செல்கின்றன. கல்வியின் தரத்தை உயர்த்துவதற்கு ஒதுக்கப்படும் நிதியோ வெறும் 1 விழுக்காடுதான்!

2009 - 2010 கல்வியாண்டுக் கட்டத்தில் பல் வேறு மாநிலங்களின் பட்ஜெட்டுகளில் தொடக் கக் கல்விக்கான நிதி ஒதுக்கீடுகள் பற்றிய அந்த அறிக்கை, இந்த ஒதுக்கீடுகளின் உண்மையான இலக்காகிய குழந்தைகள் எந்த அளவுக்குப் பயனடைந்திருக்கிறார்கள் என ஆராய்கிறது. ஆய்வுக்கு எடுத்துக்கொள்ளப்பட்ட மாநிலங் களில், தொடக்கக்கல்விக்கான நிதி ஒதுக்கீடு, பணக்கணக்கின்படி கணிசமாக அதிகரிக்கப் பட்டிருக்கிறது. 2007-08ம் ஆண்டில் ரூ.68,710 கோடி நிதி ஒதுக்கப்பட்டது. 2009-10ல் அது ரூ.97,255 கோடியாக உயர்த்தப்பட்டது. மாநிலத் துக்கு மாநிலம் மாறுபட்ட இதில் சில வேறுபாடு கள் இருக்கின்றன என்றாலும், ஒட்டுமொத்த மாகப் பார்க்கிறபோது குழந்தைகளின் நேரடிக் கல்விக்கு மிகச் சொற்பமான தொகைதான் வழங்கப்பட்டிருக்கிறது என்பதை அறிக்கை சுட்டிக்காட்டுகிறது.

ஆசிரியர்களின் ஊதியம் அவர்களது நெடும் போராட்டத்தின் பலனாகக் கிடைத்திருப்பது. அதே போல் கூரையில்லாப் பள்ளிக்கூடங்கள் இன்னும் தொடர்கிற நிலையில் உள்கட்டுமானங் களுக்காக, இன்னும் பல மடங்கு நிதி ஒதுக்க வேண்டியுள்ளது. ஆனால் இந்த நடவடிக்கைகள் அனைத்தும் எதற்காக? குழந்தைகளுக்குத் தரமான கல்வி கிடைத்தாக வேண்டும் என்பதற் காகத்தானே? அதற்கான நேரடி நிதியை 1 விழுக்காடு அளவுக்குக் குறைத்துவிட்டு, மற்ற செலவினங்களை மட்டும் அதிகரிப்பதால் என்ன பயன்? ஆசிரியர்களுக்கான நிதி ஒதுக் கீடு குறைவாக உள்ள மாநிலங்களும் இருக்கின் றன. அதற்குக் காரணம் நிரந்தர ஆசிரியர்களுக்கு பதிலாக, கணிசமான எண்ணிக்கையில் ஒப் பந்த ஆசிரியர்கள் குறைந்த ஊதியத்தில் நியமிக் கப்பட்டிருப்பதுதான்!

கட்டாய இலவசக் கல்விச் சட்டம் கொண்டு வரப்பட்டுள்ள நிலையில், இவ்வாறு குழந்தை களுக்கு நேரடியாக பலனளிக்கும் நிதி குறை வாக இருப்பது ஒருவகையில் அந்தச் சட்டத் தையே மீறுவதாகிவிடும். வசதியுள்ளவர்கள் தங்கள் குழந்தைகளைத் தனியார் பள்ளிகளில் சேர்க்க, அரசுப்பள்ளிகளில் பயிலும் ஏழைக் குழந்தைகளுக்கான தரமான கல்வி உரிமையை மறுப்பதாகிவிடும். கல்வியில் ஏற்றத்தாழ்வை ஒழிக்க, போதுமான நிதி ஒதுக்கீட்டிற்கான போராட்டம் வலுப்பெற வேண்டியதன் அவசியத் தைத்தான் இந்த ஆய்வு புலப்படுத்துகிறது.

நன்றி : http://cerdpsf.blogspot.com/

அறிவியல் திருவிழா..

2012-01-05T22:37:00.001+05:30

JAN 5, 2012

இது என்ன அறிவியல் திருவிழா? வித்தியாசமாக இருக்கிறதே என்று தமிழ்நாடு அறிவியல் இயக்கத்திற்கு கொஞ்சம் அப்பாற்பட்ட நண்பர்களுக்கு தோன்றக்கூடும். தமிழ்நாடு அறிவியல் இயக்கம் ஆண்டு முழுவதும் பல்வேறு நிகழ்ச்சிகளின் மூலம் தமிழகம் முழுக்க அறிவியல் விழிப்புணர்வை ஏற்படுத்தி வருகின்றது. ஆனால் அதிலிருந்து கொஞ்சம் வேறுபட்டது நான் இங்கே சொல்லப்போவது..

டிப்டாப்பான மெட்ரிக் மாணவர்களும் சட்டைப்பித்தானின்றி பின்னூக்கு அணிந்த அரசுப்பள்ளி மாணவர்களும் ஒன்றாய் கலந்துகொண்ட திருவிழா.. மிகப்பெரிய மாநகரங்களைச் சேர்ந்த மாணவர்களும் எந்தவிதத்திலும் வெளியுலகிற்கு அறிமுகமே ஆகாத, போக்குவரத்து வசதிகளேகூட இல்லாத மிகப்பின்தங்கிய கிராமத்து மாணவர்களும் ஒருசேரக் கலந்து கொண்ட திருவிழா.. தமிழகம் முழுவதுமிருந்து இண்டர்நேஷனல் பள்ளிகள்,அரசுப் பள்ளிகள்,அரசு நிதியுதவி பெறும் தனியார் பள்ளிகள், மெட்ரிக் பள்ளிகள், துளிர் இல்லங்கள், மாற்றுத் திறனாளிகள் பயிலும் சிறப்புப் பள்ளிகள், இரவுப் பள்ளிகள் என அனைத்து விதமான பள்ளிகளிலிருந்தும் ஆயிரத்திற்கும் மேற்பட்ட மாணவர்கள் கலந்து கொண்ட ஒரு திருவிழா.. ஆம். தமிழ்நாடு அறிவியல் இயக்கத்தின் ஒருங்கிணைப்பில் கடந்த நவம்பர் 24,25,26 தேதிகளில் சத்தியமங்கலம், பண்ணாரியம்மன் தொழில்நுட்பக் கல்லூரியில் நடைபெற்ற 19 வது தேசிய குழந்தைகள் அறிவியல் மாநில மாநாடுதான் அந்த திருவிழா..!

இதுவெறும் குழந்தைகள் அறிவியல் மாநாடு தானே என்று குறைத்து மதிப்பிட்டு விடாதீர்கள். குழந்தைகளின் ஆய்வுகள் பல்வேறு சூழ்நிலைகளில் நீதிமன்றத்தீர்ப்புகளுக்கெ அடிப்படையாக இருந்திருக்கிறது.. பல ஊர்களில் உள்ள நீர்நிலைகளைக் காப்பாற்றி மேம்படுத்தியுள்ளது. திருப்பூர் சாயப் பட்டறைகளை ஆய்வுக்கு உட்படுத்தியிருக்கிறது. உள்ளூர் மக்களின் பாரம்பரிய விவசாயம் குறித்து, உள்ளூர் வளங்கள் குறித்து ஆய்வுபுரிந்து வெளியுலகிற்குச் சொல்கின்றனர். அனைத்திற்கும் மேலாக கடந்த 2004ம் ஆண்டு உலகையே உலுக்கிய சுனாமி பேரழிவுக்குப் பின் குழந்தைகள் மேற்கொண்ட ஆய்வினால் அலையாத்திக்காடுகள் இருந்த பகுதிகள் பெருமளவு சேதத்திலிருந்து தப்பியுள்ளதைக் கண்டறிந்து ஆய்வறிக்கை சமர்ப்பித்தனர். தற்போது மத்திய அரசின் சார்பில் அலையாத்திக் காடுகளை மேம்படுத்த சுமார் 400 கோடியை ஒதுக்கியிருக்கிறது.

இந்த மாநாடு மாவட்ட அளவில், மாநில அளவில், தேசிய அளவில் என மூன்று கட்டங்களாக நடைபெறுகிறது. தமிழகத்தில் இந்த ஆண்டு மட்டும் மாவட்ட அளவிலான மாநாடுகளில் சுமார் பத்தாயிரம் மாணவர்கள் பங்கேற்றுள்ளனர்.

அதில் சிறப்பாக ஆய்வு புரிந்த 196 மாணவ ஆய்வுக்குழுக்கள் மாநில மாநாட்டிற்கு தேர்வு செய்யப்பட்டு கலந்துகொண்டனர். நிலவளம்:வளத்திற்காகப் பயன்படுத்துவோம், வருங்காலத்திற்கும் பாதுகாப்போம் என்ற பொதுத்தலைப்பின் கீழ் தமிழ்-இளையோர், தமிழ்-மூத்தோர், ஆங்கிலம்-இளையோர், ஆங்கிலம்-மூத்தோர் என நான்கு பிரிவுகளில் குழந்தைகள் ஆய்வுகளைச் சமர்ப்பித்தனர். மாநில மாநாட்டில் இருந்து 30 ஆய்வுக்குழுக்கள் குழந்தை விஞ்ஞானியர் விருதுக்காக தேர்வுசெய்யப்பட்டுள்ளனர். இந்த மாணவர்கள் இந்த மாதம் 27-31 ஆகிய தேதிகளில் ராஜஸ்தான் தலைநகர் ஜெய்ப்பூரில் நடைபெற்ற தேசிய அளவிலான மாநாட்டில் கலந்துகொண்டனர். மாண்புமிகு முன்னாள் குடியரசுத் தலைவர் அவர்கள் கலந்துகொண்டு இம்மாணவர்களுக்கு விருது வழங்கினார்.

நம் தேசம் முழுவதுமுள்ள அனைத்து ஆய்வு நிறுவனங்களில் இருந்தும் விஞ்ஞானிகள் பங்கேற்கும் இந்திய அறிவியல் மாநாடு ஒவ்வொரு ஆண்டும் ஜனவரி 2வது வாரம் நடைபெறும். அந்த மாநாட்டில் கலந்துகொள்ள மிகச்சிறப்பான தலைப்புக்களை எடுத்து ஆய்வுகளை மேற்கொண்ட 2 ஆய்வுக்குழு மாணவர்கள் (தமிழகத்திலிருந்து) இந்திய அறிவியல் மாநாட்டில் கலந்துகொள்ளவும் தேர்வுசெய்யப்பட்டுள்ளனர். எவ்வளவு பெரிய சிறப்பு!

மக்கள் அறிவியல் இயக்கங்களின் சோதனை முயற்சியில் துவங்கி இன்று இந்தியா முழுவதும் ஆண்டுதோறும் சுமார் 2 லட்சத்துக்கும் மேற்பட்ட குழந்தைகள் தங்களது வாழ்விடத்தில், பள்ளிகளில் சின்னச் சின்னப் பிரச்சனைகளைத் தேர்ந்தெடுத்து அதுகுறித்து மூன்று மாதங்கள் ஆய்வு புரிந்து அதனைச் சமர்ப்பித்து வருகின்றனர். மத்திய அரசின் அறிவியல் தொழில்நுட்பத்துறையும் தேசிய தகவல் தொழில்நுட்ப பரிமாற்றக்குழுவும் அறிவியல் இயக்கங்களும் இணைந்து நடத்தக்கூடிய இம்மாநாட்டில் பள்ளியில் படிக்கின்ற குழந்தைகள் மட்டுமின்றி இடைநின்ற மாணவர்களும்கூட பங்கேற்கலாம். வயது 10 முதல் 17 என்பதைத் தவிர எவ்வித தடைகளும் இல்லை. சாதிக்கத் துடிக்கும் மாணவ கண்மணிகளுக்கு இது ஒரு நல்ல வாய்ப்பு..!

படித்த அறிவியலை வாழ்க்கையோடு தொடர்புபடுத்திப் பார்க்கவும் சமூகப் பிரச்சனைகளுக்கு அறிவியல் வழிமுறையில் தீர்வுகளைச் சொல்லவும் பரந்துபட்ட மக்களுடன் ஒருங்கிணைந்து வாழவும் இந்த மாநாடு மாணவர்களுக்கு பயிற்சியளிக்கிறது. அதனினும் மேலாக பங்கேற்ற குழந்தைகள் பேசும்போது பெரியவர்களுக்கே கூட இல்லாத மனப்பக்குவத்தோடு பேசுகின்றனர்.

எனக்கு வெற்றி தோல்வியெல்லாம் பிரச்சனையில்லை. எனது ஆய்வின் அனுபவத்தைப் பகிர்ந்து கொண்டேன். மற்றவர்களின் அனுபவத்தைப் பெற்றுக்கொண்டேன் என்றும் தேசிய அளவிலான மாநாட்டில் நாங்கள் கலந்துகொள்ள முடியாவிட்டாலும் பரவாயில்லை. கலந்துகொள்கின்ற மாணவர்களுக்கு அனைவரின் சார்பாகவும் வாழ்த்துகளைத் தெரிவித்துக் கொள்கிறேன் என்றும் சிரித்தமுகத்தோடு சொல்லும் அந்த குழந்தைகளுக்கு உரக்கக் கைதட்ட தோன்றுகிறது நமக்கு.. இந்த மாநாட்டில் கலந்துகொண்டதே நான் செய்த பாக்கியம். எனக்கு உதவி செய்த தலைமை ஆசிரியருக்கும், மூன்று மாதங்களாய் எவ்வித முகச்சுழிப்பும் இல்லாமல் வழிகாட்டி உதவிய ஆசிரியருக்கும் வாய்ப்பளித்த தமிழ்நாடு அறிவியல் இயக்கத்திற்கும் நன்றி என சில குழந்தைகள் கண்ணீர் மல்க பேசும்போது எழுந்து நிற்கத் தோன்றுகிறது அவர்களின் மனமுதிர்ச்சிக்கு மரியாதையாய்.. வேறு எந்த நாட்டிலும் இத்தகைய ஒரு மாபெரும் குழந்தைகள் அறிவியல் மாநாடு இதுவரை நடந்ததில்லை. அதனால்தானோ என்னவோ பக்கத்து நாடுகளான வங்கதேசம், நேபாளத்தில் இருந்துகூட குழந்தைகள் இந்த மாநாட்டில் கலந்துகொள்கின்றனர். இவ்வளவு சிறப்பு வாய்ந்த மாநாட்டைக் கடந்த 19 ஆண்டுகளாக ஒருங்கிணைத்து நடத்திவரும் தமிழ்நாடு அறிவியல் இயக்க நண்பர்களும், தொடர்ந்து தமது பள்ளிக் குழந்தைகளை அறிவியல் பாதையில் அழைத்துச் செல்கின்ற ஆசிரியப் பெருமக்களும் பாராட்டிற்குறியவர்கள்.. அதுசரி, அடுத்த ஆண்டு உங்கள் பள்ளியிலிருந்தும் கலந்துகொள்வீர்கள் தானே?

நன்றி:-தேனி.சுந்தர்.(9488011128) &

புதியஆசிரியன் (www.puthiyaaasiriyan.com)

source : http://tnsftheni.blogspot.com/2012/01/blog-post.html

மொபைல் போன் வழியாக ரயில் பயண முன்பதிவு !

2012-01-05T16:43:00.001+05:30

இந்தியன் ரெயில்வேஸ் இப்பொழுது மூன்று புதிய சர்வர்களை நிறுவியுள்ளது.

ஆம் உங்கள் மொபைல் போன் மற்றும் கையைடக்க சாதனங்களில் இருந்து நீங்கள் உங்களது புக்கிங்கை மேற்கொள்ளலாம்.

இதில் என்ன புதிது என கேட்பவர்களுக்கு.....

இது வரை வெப்சைட்டில் மட்டுமே ரிஸர்வேஷன் செய்ய இயலும் நீங்கள் மொபைல் போனில் ரிஸ்ர்வ் செய்ய முனைந்தால் அது பேஜை சரியாக காட்டாது. அது போக அந்த சைட் (https ) வேறு மாதிரி அதனால் அந்த பாக்கெட் அக்னாலட்ஜ்மென்ட் வேறு மாதிரி.

இது மொபைல் போன்களுக்காகவே செய்யபட்ட டிசைன் மற்றும் இதற்கென இப்போது தனி சர்வர்கள் நிறுவப் பட்டுள்ளன.

முன்பதிவு செய்த டிக்கட்டை புக் மார்க் செய்து கொண்டால் பயணிக்கும் போது அப்படியே காட்டலாம் இல்லயெனில் லாகின் செய்து காட்ட ஈஸி....

தயவு செய்து பகிரவும்.....

https://www.irctc.co.in/mobile

IRCTC launches a smarter way to book tickets. Now book your rail ticket -ANYWHERE ANYTIME through your Mobile Phones.IRCTC brings to you the mobile websitehttps://www.irctc.co.in/mobile with just a few clicks you can book your tickets using your Mobile Phones. IRCTC mobile website is convenient and easy to use, can be accessed from any browser enabled mobile having basic GPRS activated on phone.

The following features are available:

Book Ticket/ Enquiry - Book tickets by providing source and destination.

Booked History - Tickets whose Date of Journey is due will be visible.

Cancel Ticket - Cancel any of the tickets whose date of journey is due.

Browse the URL using your mobile and book tickets using any of your credit/debit card for payment.

Help for booking

1. Login to URL with your existing IRCTC user id and password.

2. Fill in details for plan my travel.

3. Select the train and continue the booking.

4. Use existing passenger list on add passengers.

5. Confirm booking details and pay through Credit/debit card to get successful booking.

நன்றி : http://salemdistpress.blogspot.com/2012/01/blog-post.html

2012-01-02T01:24:00.002+05:30

மூடநம்பிக்கைகளை கைவிட்டு அறிவியலை நம்புங்கள் : நோபல் பரிசு விஞ்ஞானி வேண்டுகோள்

2011-12-31T22:57:00.001+05:30

""மூடநம்பிக்கைகளை கைவிட்டு, அறிவியல் ரீதியில் நிரூபிக்கப்பட்ட விஷயங்களை நம்ப வேண்டும்; மூட நம்பிக்கைகளால் ஏற்படும் ஆபத்துகளில் இருந்து மனித இனத்தை அறிவியல் காத்து வருகிறது,'' என, நோபல் பரிசு பெற்ற விஞ்ஞானி வெங்கட்ராமன் ராமகிருஷ்ணன் கூறினார். ........................................
.............................................

..................................ஜோதிடம் அறிவியல் பூர்வமானது அல்ல. கோள்கள், நட்சத்திரங்கள் நமது தலைவிதியை நிர்ணயிக்க கூடியவை அல்ல. பிறக்கும்போதே நம் தலைவிதி நிர்ணயிக்கப்பட்டுவிடுகிறது என்பதற்கு அடிப்படை ஆதாரம் ஏதும் இல்லை.நவீன விஞ்ஞானம் மருத்துவத்துடன் கைகோர்த்ததால் தான், மனிதனின் சராசரி ஆயுள் காலம் இரண்டு மடங்காக உயர்ந்துள்ளது. மருத்துவத்திலும் அறிவியல் பூர்வமான விஷயங்களை மட்டுமே நம்ப வேண்டும். ஆதாரப்பூர்வமாக நிரூபிக்கப்படாதவற்றை நம்பக் கூடாது.

சுற்றியிருக்கும் உலகத்தை நம்பிக்கையின் அடிப்படையில் பார்க்காமல் அறிவியல் பூர்வமாக பார்க்க வேண்டும். பலமுறை பரிசோதிக்கப்பட்ட விஷயங்களை மட்டுமே ஏற்றுக்கொள்ள வேண்டும். அறிவியல் பூர்வமாக கண்டுபிடிக்கப்பட்ட மருந்துகளால் பெரியம்மை முற்றிலும் ஒழிக்கப்பட்டுள்ளது. அறிவியல் பூர்வமாக நிரூபிக்கப்படாத நம்பிக்கையின் அடிப்படையிலான மருத்துவ முறைகளை ஏற்றுக் கொள்ள கூடாது. இவ்வாறு அவர் பேசினார். பின், மாணவர்கள் மற்றும் பார்வையாளர்களின் கேள்விகளுக்கு அவர் பதிலளித்தார். சிறந்த கேள்வி கேட்ட மாணவர் ஒருவருக்கு புத்தகங்களை பரிசளித்தார்.

source: Dinamalar & THE HINDU

நன்றி :திருமிகு. பார்த்தசாரதி, கல்பாக்கம்.

"தானே" புயலால் பாதிக்கப்பட்டவர்களுக்கு உதவ வேண்டி

2011-12-31T22:42:00.002+05:30

அன்புடையீர்,

வணக்கம்,

கொடூரமான "தானே" புயல் காரணமாக கடலோர மாவட்டங்கள் பலத்த சேதங்களுக்கு உள்ளாகியுள்ளது, குறிப்பாக கடலூர் மற்றும் பாண்டிச்சேரி மாவட்டத்தின் அனைத்துப் பகுதிகளும் பெரிதும் பாதித்துள்ளது, கடல் நீர் ஊருக்குள் புகுந்ததலும், கடும் புயல் காற்றினாலும் மக்கள் பெரும்பாலான கூரை மற்றும் ஓட்டு வீடுகளை இழந்துள்ளனர். இருக்க இடம் இல்லாமலும் அனைத்து பொருட்களையும் இழந்தும் உள்ளனர். குழந்தைகள் மிகுந்த சிரமத்திற்கு உள்ளகியுள்ளனர். மரங்கள் வேருடன் வீழ்ந்துள்ளதாலும் சாலைகள் கடுமையாக பாதிக்கப்பட்டுள்ளதாலும் பால் போன்ற அத்தியாவசிய பொருட்கள் எதுவும் கிடைக்காத நிலையும் போக்குவரத்தும் முடங்கியும் உள்ளது, மின்கம்பக்கள் பெரும்பாலனவை முறிந்துள்ளதால் மின்வசதி இல்லாத நிலையில் இருளில் மூழ்கியுள்ளனர். உணவுப் பொருட்கள் தட்டுப்பாடும்,பால்விலை கடுமையாக உயர்ந்தும் உள்ளது. அங்குள்ள நம் அறிவியல் இயக்க மாவட்ட செயலாளரிடம் கேட்டப்போது,பால், பால்பவுடர், பிஸ்கட், பாய், போர்வை போன்ற அத்தியாவசிய பொருட்களை கொடுத்து உதவ வேண்டியுள்ளார்,

ஆகையால் நண்பர்களே தங்களால், இயன்ற பொருட்களையோ நிதியோ கொடுத்து உதவ வேண்டுகிறோம்,

(உதவ தொடர்புக்கொள்ளவும்: 94864 86755, 98945 35048)

இப்படிக்கு

வெ.ராமமூர்த்தி - 94864 86755

மாவட்ட செயலாளர்,

சேலம் மாவட்டம்.

125 ஆண்டுகளுக்குப் பிறகேனும்

2011-12-22T21:43:00.001+05:30

முனைவர் நா.மணி

டோக்கியோ அறிவியல் தொழில் நுட்பப் பல்கலைக் கழகத்தின் கணிதத்
துறை தலைவர் அவர். கணித மேதை இராமானுஜன் பற்றி ஜப்பானிய மொழியில்
புத்தகம் எழுதி உள்ளார். நூலாக்கத்தின் துவக்க கட்டத்தில் ஈரோடு
வந்திருந்தார். அந்நூலை வெளியிடும் பதிப்பக உரிமையாளர், புகைப்பட
கலைஞர், அறிவியல் இயக்க ஆர்வலர் என ஒரு குழுவாக வந்தனர். என்னைத்
தொலைபேசியில் அழைத்து, ’இராமனுஜன் வீட்டைப் பார்வையிட வேண்டும் அழைத்துச்
செல்லுங்கள்” என்றனர். கணிதமேதை இராமனுஜன் ஈரோட்டில் பிறந்தவர் என்று
அறிவேனே தவிர, ஈரோட்டில் அவர் பிறந்த இடத்தை அறிந்து கொள்ளும்
முயற்சியில் இறங்கியது இல்லை. இவ்வாறு அறிந்து கொள்ளாமல் இருந்தமைக்கு
மிகவும் வெட்கப்பட்டேன். நம்பி வந்த குழுவினருக்கு உதவிடும் முயற்சியில்
இறங்கினேன். வரலாற்று ரீதியாக பல விபரங்களை அறிந்த ஓர் அறிவு ஜீவியை
தொடர்பு கொண்டு விசாரித்தேன். அவரோ, ’அய்யா, கணித மேதை ஈரோட்டிலா
பிறந்தார்?” என்றார். இதற்கு மேல் யாரிடம் கேட்பது என்று ஐயம் மேலிட
எனக்குத் தெரிந்தவர்கள், விபரமறிந்தவர்கள், அரசியல்வாதிகள் என பலரிடமும்
கேட்டேன். அரை மணி நேர தகவல் அறியும் எனது முயற்சி படுதோல்வியில்
முடிந்தது. ஜப்பான் கணிதப் பேராசிரியர் என் அழைப்புக்காக விடுதியில்
காத்துக் கொண்டு இருந்தார். வருத்தம் தோய்ந்த மனதுடன் நேரில் காண
சென்றேன்.

‘ஈரோடு, தெப்பக்குளம், பழைய சார் பதிவாளர் அலுவலகத்திற்கு
எதிர்வீடு” என்ற ஆவணக் குறிப்பை வைத்துக் கொண்டு ஆட்டோவில் அங்கு சென்று
அடைந்தோம். ஈரோட்டின் மையப்பகுதி அது. ஈஸ்வரன் கோவிலுக்கு அருகில்
இருக்கிறது. உண்மையில் தெப்பக்குளம் எந்தக் காலத்தில் இருந்ததோ
தெரியவில்லை. தெப்பக்குளம் என்ற பெயர்; மட்டும் நின்று நிலவுகிறது.
அறிவு ஜீவிகளுக்கு தெரியாத இடத்தை ஆட்டோ டிரைவர் எளிதாக கண்டுபிடித்து
கொடுத்தார். கதவு எண்.18, அழகிய சிங்கர் வீதி, தெப்பக்குளம், ஈரோடு - 1
என்பதே அந்த வீட்டின் முகவரி. இங்குதான், 124 ஆண்டுகளுக்கு முன்
22.12.1887 - ல் கணித மேதை சீனிவாச இராமானுஜன் பிறந்தார். நாளை முதல்
125 ம் ஆண்டு தொடங்குகிறது.

இராமானுஜன் வாழ்ந்த இடங்களைப் பார்வையிட ஜப்பானிய பேராசிரியர் பல
முறை சென்னைக்கும், கும்பகோணத்துக்கும் வந்திருந்ததாகவும், அவர் பிறந்த
இடத்தைப் பற்றிய குறிப்புகள் இன்மையால் துயரத்துடன் திரும்பிச்
சென்றதாகவும் கூறினார். தனது வாழ்நாளில் இதனை விட கூடுதல் மகிழ்ச்சி
அடைந்த தருணம் இல்லை எனக் கூறி, நம்மை இறுக்கி அணைத்துக் கொண்டார். அவர்
பிறந்த வீட்டையும், அந்த வீதியையும் போட்டோவாக எடுத்துத் தள்ளினர்
புகைப்படக் கலைஞர். அந்த வீதியில் குடியிருந்தோருக்கும் கூட அன்றுதான்
கணிதமேதை இராமானுஜன் பிறந்த இடம் பற்றி தெரிய வந்தது. சென்னையில் உள்ள
இராமானுஜன் அருங்காட்சியகத்திற்கும் அது முக்கிய ஆவணம். உலக வரலாற்றில்,
கணிதமேதை இராமானுஜன் பிறந்த இடம் பற்றிய முதல் புகைப்படம் எடுக்கப்பட்ட
நாள் அன்றுதான். இந்த சம்பவம் என்றோ நடந்தது என்று எண்ணி
விடாதீர்கள், இரண்டு ஆண்டுகளுக்கு முன்பு 2008 - ஆம் ஆண்டு ஆகஸ்ட்
17 ம்தேதி.

இராமானுஜன் பிறந்த வீடு, தற்போது அவரது சொந்தக்காரர்கள் வசம் கூட
இல்லை. பெருமுயற்சி எடுத்து தேடிப்போகும் ஒன்றிரண்டு பேரிடம் கூட வீட்டு
உரிமையாளர், ‘கணித மேதை இராமானுஜன் இங்கேதான் பிறந்தாரா?” என்ற
கேள்விக்கு ஆம் என பல நேரங்களில் பதில் தருவதில்லை. இந்த விசயம்
பிரபலமாகி, வீட்டை அரசாங்கம் எடுத்துக் கொள்ளுமோ என்ற பயம். ஜப்பான்
பேராசிரியர் சக்குராய் வந்த அன்று உரிமையாளர் வீட்டில் இல்லை. அவரது
மகன் ஆற அமர வைத்து உபசரித்து அனுப்பினார். நான் பார்க்கும்
நண்பர்களிடம் எல்லாம் இந்த வீட்டைப் பற்றி சொல்லித் திரிகிறேன்.
அவ்வீட்டைக் காண விளைவோரிடம் நான் கூறும் செய்தி இதுதான். ‘ஈரோடு பிர‡ப்
ரோட்டில் உள்ள சிவரஞ்சனி ஓட்டலுக்கு எதிர் சந்தில் செல்லுங்கள். அழகிய
சிங்கர் வீதி வலது புறத்தில் வரும். வீதியில் நுழைந்ததும் நான்கு, ஐந்து
வீடுகள் தள்ளி மஞ்சள் கோபி நிறத்தில், உள்ள வீடு. ஜோதி நிலையம் என்று
பெயர் எழுதப்பட்டிருக்கும். சற்று நேரம் நின்று பார்த்து விட்டு வந்து
விடுங்கள்” என்பதுதான். இந்த நிகழ்வுக்குப் பிறகு, அந்தப் பக்கம்
செல்லும் போதெல்லாம் அழகிய சிங்கர் வீதியில் நுழைந்து, அந்த வீட்டின்
மீது ஓர் பார்வை வீசி விட்டு வருகிறேன்.

எனது அலைபேசி எண்ணில் ஒரு முறை லண்டன் கணிதப் பேராசிரியை ஒருவர்
தொடர்பு கொண்டார். தான் இந்தியாவுக்கு வந்திருப்பதாகவும்
திருவனந்தபுரத்தில் இருப்பதாகவும் கூறினார். கோவைக்கு விமானத்தில்
வந்து, அங்கிருந்து ஈரோட்டுக்கு காரில் வர இருப்பதாக கூறினார். தனக்கு
கணித மேதையின் வீட்டை காண்பிக்க வேண்டும் என்றார். ‘நான் ஊரில் இல்லை.
பிறிதொரு முறை வாருங்கள்” என்றேன். ‘நான் பல முறை இந்தியா வந்துள்ளேன்.
பல முறை கும்பகோணம், சென்னை என சென்று, அவர் வாழ்ந்த இடங்களை எல்லாம்
பார்வையிட்டுள்ளேன். ஈரோடு வந்து, அவரது பிறப்பிடம் கண்டுபிடிக்க
இயலாமல் திரும்பிச் சென்ற நாட்களும் உண்டு. எனவே தயவு கூர்ந்து உதவி
செய்யுங்கள்” என்றார். மாற்று ஏற்பாடு மூலம் காண ஏற்பாடு செய்தேன்.
லண்டனில் இருந்து வந்த பெண் பேராசிரியர் என்பதால் வீட்டு உரிமையாளர்
வீட்டில் இருந்தும், மறுப்பு எதுவும் கூறாமல் வீட்டில் அனுமதித்து,
உபசரித்து அனுப்பினார். கார் ஏறும் போது அவருக்கு ஆனந்தக் கண்ணீர்
பெருக்கெடுத்தது.

கணிதம் படித்த அனைவரும் கணித மேதை இராமானுஜனை அறிவர்.
இராமானுஜத்தின் வாழ்க்கை வரலாறு பல மொழிகளில் எழுதப்பட்டு உள்ளது.
இராபர்ட் கனிகள் என்ற இங்கிலாந்து நாட்டுக்காரர் எழுதிய நூலின் தலைப்பு
‘;முடிவற்றதைக் கண்டறிந்த மனிதன்” என்பது. இந்தப் புத்தகம் பல
பதிப்புகளைக் கண்டுள்ளது. இராமானுஜத்தின் வாழ்க்கை வரலாற்று நூல்களில்
தலைசிறந்ததாக கருதப்படுவதும் இந்த நூலே. இத்தகைய நூல்கள் ஒரு பக்கம்.
இராமானுஜன் இறந்த பிறகு, அவரது சமன்பாடுகள், கோட்பாடுகளை ஆய்ந்தறிந்த
கணித மேதைகளுடன் இணைத்து பெயரிடப்பட்ட சமன்பாடுகள் அவரது பெயரிடப்பட்ட
ஆய்விதழ்கள், அவரது பெயரில் உருவாக்கப்பட்டுள்ள பரிசுகள் ஆய்வு மையங்கள்
என 25 க்கும் மேல் பட்டியல் நீளும்.
ராயல் சொசைட்டி ஆ‡ப் இங்கிலாந்தின் மதிப்புமிக்க அங்கத்தினராக
மிக இளவயதில் தேர்வு செய்யப்பட்டவர். கேம்பிரிட்ஜ் பல்கலைக் கழகம் இவர்
செய்த ஆய்வுகளுக்காகவே டீ.யு. பட்டம் வழங்கியது. அந்த டீ.யு. பட்டமே
பின்னர் டாக்டர் பட்டமாக பெயர் மாற்றம் செய்து அறிவிக்கப்பட்டது.
இத்தகைய கௌரவம் கேம்பிரிட்ஜ் பல்கலைக் கழகத்தில் வேறு எவருக்கும்
வழங்கப்பட்டுள்ளதா எனத் தெரியவில்லை.

கணித மேதை இராமானுஜத்தை கண்டெடுத்து உலகறியச் செய்தவர்
பேராசிரியர் ஹார்டி. இவரிடம் ‘உலகக் கணித மேதைகளை 100 புள்ளிகளைக் கொண்ட
அளவுகோலில் அளந்தால் யார், யார் எத்தனை புள்ளிகள் தேறுவர்” என்று
கேட்டனர். ‘நான் ஒரு 25 புள்ளிகள் தேறுவேன். லிட்டில்வுட் 30 புள்ளிகள்
பெறுவார். டேவிட் ஹில்பர்ட்டுக்கு 80 புள்ளிகள் வழங்கலாம். 100
புள்ளிகள் பெற தகுதியுள்ளவர் இராமானுஜன் மட்டுமே” என்றார்.
இராமானுஜத்தின் இரண்டாவது நோட்டுப் புத்தகத்;தில் இருந்த 47
கோட்பாடுகளைத் தொகுத்து புத்தகமாக வெளியிட்ட பேராசிரியர் ஹார்டி
‘எஞ்சியுள்ள ஆய்வுகளை தொகுத்து வெளியிட என் ஆயுட்காலம் போதாது. வேறு
எந்த ஆய்விலும் ஈடுபட முடியாது” என மலைத்துப் போய் கூறினார். 18ஆம்
நூற்றாண்டில் உலகப் புகழ் பெற்று விளங்கிய ஜெர்மனிய கணித மேதை ஜேகப்
ஜேகோபியுடனும், 17 ஆம் நூற்றாண்டில் உலகப் புகழ் பெற்று விளங்கிய சுவிஸ்
நாட்டு கணித மேதை லியனார்டு ய+லரோடும் ஐரோப்பிய கணித மேதைகள் இவரை
ஒப்பிடுகின்றனர்.

இராமானுஜத்தின் வாழ்வையும் பணியையும் முன் வைத்து பத்துக்கும்
மேற்பட்ட புகழ்பெற்ற திரைப்படங்கள், நாடகங்கள், புனைக் கதைகள் உலகம்
முழுவதும் எழுதப்பட்டுள்ளது. நோய்க்கிருமிகள் உடலில் புகுந்து
இராமானுஜத்தின் உடலை அரிக்கத் தொடங்கிய பின்னரே, இங்கிலாந்து செல்ல
கப்பல் ஏறினார். 1914 முதல் 1919 வரையான கேம்பிரிட்ஜ் வாழ்க்கையில்
நோயுடன் போராடிக் கொண்டே, கணிதம் என்னும் பெருங்கடலில் மூழ்கி,
முத்தெடுத்த வண்ணமே இருந்தார். முறைப்படியான கணித கல்வி பெறாமலும்,
ஐந்தாண்டு காலத்திலும், இவ்வளவு சாதனைகளை நிகழ்த்திய மனிதன்; உலகில் இவர்
ஒருவராகத்தான் இருக்க முடியும்.

ஐன்ஸ்டினின் இயற்பியல் சாதனைகளை போற்றிட 2005ம் ஆண்டை சர்வதேச
இயற்பியல் ஆண்டாக சர்வதேச சமூகம் கொண்டாடியது. கலிலியோவின் பங்களிப்பை
வானவியலில் போற்றும் வகையில் 2009ம் ஆண்டு சர்வதேச வானவியல் ஆண்டாக
பன்னாட்டு சமூகம் கொண்டாடி மகிழ்ந்தது. வேதியியலுக்கு மேரிகிய+ரி ஆற்றிய
பங்கை நினைவு கூற 2011ம் ஆண்டு சர்வதேச வேதியியல் ஆண்டாக
கொண்டாடப்பட்டுள்ளது. இராமானுஜத்தின் 125ஆம் ஆண்டு பிறந்த ஆண்டையொட்டி
2012ஆம் ஆண்டு சர்வதேச கணித ஆண்டாக அறிவிக்கப்பட்டு இருக்க வேண்டும்.
அவ்வாறு ஐ.நா.சபை அறிவிக்காமல் விட்டது வேதனை அளிக்கும் விசயம்.
அதனினும் கொடியது, 125 ஆண்டுகளுக்குப் பிறகும், கணித மேதை இராமானுஜன்
பிறந்த இடம் உலகம் அறியாமல் இருப்பது. அதனை அறிந்தவர்கள் கூட அந்த
வீட்டிற்குள் சென்று, நிதானமாக பார்த்து வர முடியாமல் இருக்கும் அவலம்.

இராமானுஜன் கணிதத்தில் மட்டும் மேதையல்ல. நற்பண்புகளிலும்,
மனிதாபிமானத்திலும் மாமேதை. கேம்பிரிட்ஜில் அவர் வாழ்ந்த காலம், முதலாம்
உலகப் போர்முடிவுற்ற தருவாய். தான் உண்டு பழகிய சைவ உணவு கிடைப்பதில்
பெருத்த சிரமம் இருந்த காலம். இருந்தும், அவர் சைவ உணவு பழக்கத்தை
கைவிடவில்லை. தனது வழிகாட்டியான பேராசிரியர் ஹார்டி தீவிரமான கடவுள்
மறுப்பாளர். இருந்தும் இருவரும் உயிருக்கு உயிராய் நட்புக்
கொண்டிருந்தார்கள். நோய் முற்றி இந்தியா திரும்பிய பிறகு வாழ்ந்தது ஓர்
ஆண்டு காலம் மட்டுமே. இறப்பதற்கு நான்கு மாதங்களுக்கு முன்பு ஹார்டிக்கு
எழுதிய கடைசிக் கடிதத்தில் கூட ‘நான் ஒரு முக்கிய சமன்பாட்டைக் கண்டு
பிடித்துள்ளேன். அதற்கு மோக் தீட்டா (ஆழஉம வுhநவய) என்று
பெயரிட்டுள்ளேன். அதில் சில எடுத்துக்காட்டுகளை தங்களுக்கு
அனுப்புகிறேன்” என்று எழுதினார். தான் படும் அவஸ்தை, ஒவ்வொரு நிமிடமும்
செத்துக் கொண்டிருப்பது, சிகிச்சைக்காக கோவை, கொடுமுடி, கும்பகோணம்,
சென்னை என அலைந்து திரிவது பற்றி ஒரு வார்த்தை கூட எழுதாதவர். இந்தியா
திரும்பியபின் தன் ஆய்வுகளைத் தொடர சென்னைப் பல்கலைக் கழகம் அளித்த
ஸ்காலர்ஷிப்பின் ஒரு பகுதியை ஏழை மாணவர்களின் கல்விக்கும் நோட்டு
புத்தகங்களுக்கும், உடைகள் மற்றும் பள்ளிக் கட்டணத்திற்கு செலவிடும்படி
தெரிவித்தவர். வறுமை, ஏழ்மை, காச நோய் ஆகியவை தன்னை பங்கிட்டுக் கொண்ட
போதும் இத்தகைய கருணை உள்ளத்தோடு இருந்தது கர்ணணை விஞ்சிய செயல் என்றே
குறிப்பிட வேண்டும்.

கும்பகோணத்தில் அவர் வாழ்ந்த சிறிய வீடு. படித்த டவுன் உயர்
நிலைப் பள்ளி. ஆய்வு மேற்கொண்ட கேம்பிரிட்ஜ் பல்கலைக்கழகம் இறுதியாக
ஆய்வு மேற்கொண்ட சென்னைப் பல்கலைக்கழகம். தனது இறுதி மூச்சை நிறுத்திக்
கொண்ட சென்னை பெருமாள் செட்டியார் வீடு. ஆகியவை அனைத்தும் அவரது
நினைவுகளை சுமந்து நிற்கிறது. கேம்பிரிட்ஜ் பல்கலைக்கழகத்தில்
நிறுவப்பட்டுள்ள அவரது மார்பளவு வெண்கலச் சிலை, 100 கணித மேதைகளின்
சொந்தச் செலவில் நிறுவப்பட்டது. சென்னைப் பல்கலைக் கழகத்தின் கீழ்
இயங்கி வரும், ‘தி இராமானுஜன் இன்ஸ்டிடிய+ட் ‡பார் அட்வான்ஸ் ஸ்டடி இன்
மேத்தமெடிக்ஸ்” என்ற நிறுவனத்திலும் கேம்பிரிட்ஜ் பல்கலைக் கழகத்தில்
உள்ளது போல மார்பளவு வெண்கலச் சிலை நிறுவப்பட்டுள்ளது. கணித மேதை
இராமானுஜன் அருங்காட்சியகம் மற்றும் கணிதக் கல்வி மையம் நிறுவப்பட்டு
செயல்பட்டு வருகிறது. மும்பையில் உள்ள ‘டாட்டா இன்ஸ்டிடிய+ட் ஆ‡ப்
‡பண்டமண்டல் ரிசர்ச்”, அவரது கணிதக் குறிப்பேடுகளை பொக்கிசமாக பாதுகாத்து
வருகிறது. அங்கு படிக்கும் மாணவர்களுக்கு ஓர் உந்து சக்தியாக அது
திகழ்கிறது. தஞ்சை சாஸ்திரா பல்கலைக் கழகம், 32 வயதுக்குள் கணிதத்
துறையில் சாதனை புரிந்தவர்களை உலகில் எங்கிருந்தாலும் தேடிக் கண்டறிந்து,
ஆண்டு தோறும் ‘கணித மேதை இராமானுஜன் விருது” வழங்கி வருகிறது. அவர்
பிறந்த இடத்தில் மட்டும் எந்த அடையாளமும் இல்லை. ஈரோடு நகரில்
வாழ்பவரில் ஆயிரத்தில் ஒருவருக்காவது தெரியுமா? என்பது சந்தேகம்.
இராமானுஜன் பிறந்த நாளான டிசம்பர் 22ஆம் தேதியை தமிழக அரசு மாநில அரசின்
தகவல் தொழில் நுட்ப நாளாக அறிவித்துள்ளது. இது எத்தனை பேருக்கு
தெரியும்?

கணித மேதை இராமானுஜனின் 125 வது பிறந்த ஆண்டை வெகு விமரிசையாக
கொண்டாட மத்திய, மாநில அரசுகள் ஓர் ஆண்டுக்கு முன்பே திட்டமிட்டு இருக்க
வேண்டும். போதுமான நிதி ஒதுக்கி இருக்க வேண்டும். வருடம் முழுவதுக்குமான
கொண்டாட்ட நிகழ்ச்சி நிரலை வெளியிட்டு இருக்க வேண்டும். மத்திய அரசு பல
விசயங்களில் அமைதியாக இருந்துவிடுவது போல் இந்த விசயத்திலும் அமைதியாக
இருக்கலாம். மாநில அரசு இப்போதேனும் விழித்துக் கொள்ளட்டும். உலகம்
முழுவதும் பல ஆய்வு நிறுவனங்கள் கருத்தரங்குகள் நடத்த திட்டமிட்டுள்ளன.
அறிவு ஜீவிகளோடு அந்த செய்திகள் முடிந்து விடும். குழந்தைகள்,
சிறுவர்கள், மாணவர்கள், மக்கள் என பெரும் எண்ணிக்கையில் இந்த மாமேதையின்
125-வது ஆண்டை கொண்டாட என்ன திட்டம் இருக்கிறது? கணித மேதை
இராமானுஜத்தின் 125-வது ஆண்டு விழாவையோ, பிறந்த நாளையோ, நினைவு நாளையோ
கொண்டாட வேண்டுவது, அவரது புகழ் பாடுவதற்கு அல்ல.

அவரது நினைவு அலைகளை தொடர்ந்து உருவாக்கிக் கொண்டே இருக்க
வேண்டும். அதில் நாம் திளைப்பதும் அவசியம். இராமானுஜன் என்னும் மின்
காந்த அலையை நமது குழந்தைகளையும் உணர வைப்பது அத்தியாவசியம். அதன்
வழியாக படைப்பாற்றல் என்னும் பெரு நெருப்பை பற்ற வைத்தல் வேண்டும்.
இந்திய நாடு அறிவியல் தொழில் நுட்பத்தில் சுய சார்பை எட்ட இச்சமூகக்
கடமையை செய்தாக வேண்டும். இதற்காகவே 125-வது ஆண்டு பிரமிக்கத்தக்க
வகையில் கொண்டாடப்பட வேண்டும். பத்திரிக்கைகள், ஊடகங்கள், பள்ளிகள்,
கல்லூரிகள், தொண்டு நிறுவனங்கள் என அனைத்து அமைப்புகளும் தங்கள்
பங்குக்கு நிகழ்ச்சிகளை திட்டமிடலாம்.

கணிதமேதை இராமானுஜன் வீடு உள்ள தெருவின் பெயர் ‘கணித மேதை
இராமானுஜன் வீதி” என்று பெயர் மாற்றம் செய்யப்பட வேண்டும். தற்போது அந்த
வீட்டில் குடியிருக்கும் உரிமையாளர் சம்மதத்துடன் அவரது நினைவு இல்லம்
உருப்பெற வேண்டும். வீட்டின் மேல் தளத்தில் உரிமையாளருக்கு அரசு வீடு
கட்டிக் கொடுத்து விட்டு, கீழ் தளத்தை பார்வையாளர் சென்று காணவாவது
அனுமதிக்கலாம். 125-வது ஆண்டிலேயேனும் கணித மேதை இராமானுஜத்திற்கு
நிகழ்ந்த இந்த அவலம் துடைத்தெறியப்பட வேண்டும்.

நன்றி
முனைவர் நா.மணி
கட்டுரையாளர், மாநிலத் தலைவர்
தமிழ்நாடு அறிவியல் இயக்கம் மற்றும்
ஈரோடு கலைக்கல்லூரி பேராசிரியர்

2011 நவம்பர் மாத வேலை அறிக்கை

2011-12-19T23:12:00.002+05:30

கடித எண் : 22 தேதி : 07-12-2011

1.அமைப்பு

வாரம்தோறும் வியாழன் மாலை சரியாக 7 மணிக்கு வாரந்திரக்கூட்டம் நடைபெறுகிறது. அதில் நடைப்பெற்ற மற்றும் நடைப்பெற வேண்டிய வேலைகள் திட்டமிடப்பட்டு செயல்படுத்தப்படுகிறது.

மாவட்ட அலுவலகம் தினந்தோறும் மாலை 5 மணி முதல் இரவு 8 மணி வரை திருமிகு.நமசிவாயம் அவர்களால் தன்னார்வத்துடன் நிர்வகிக்கப்படுகிறது.

2. அறிவியல் கல்வி பிரச்சாரம்

சர்வதேச வேதியியல் ஆண்டு 2011 ( IYC – 2011 )

IYC யின் நிகழ்ச்சியாக விஞ்ஞான் பிரச்சார் மற்றும் தமிழ்நாடு அறிவியல் இயக்கமும் சேர்ந்து மதுரை காமராஜர் பல்கலைகழகத்தில் 09, 10 & 11 நவம்பரில் நடத்திய பயிற்சி முகாமிற்கு சேலம் மாவட்டத்தின் சார்பாக திருமிகு டோமினிக், திருமிகு ராஜேந்திரசோழன், திருமிகு கணபதி ராணி மற்றும் திருமிகு சகிராபேகம் ஆகியோர் கலந்து கொண்டனர். நால்வரும் பயிற்சி, களப்பணிகள் மற்றும் அனைத்து ஏற்பாடுகளும் சிறப்பாக இருந்ததாக மகிழ்ச்சியுடன் தெரிவித்தனர். பயிற்சியில் கலந்து கொள்ள தகவல் கொடுத்து வாய்பளித்த தமிழ்நாடு அறிவியல் இயக்கத்திற்கு தங்கள் நன்றியை தெரிவித்து கொண்டதுடன் அறிவியல் இயக்க நிகழ்ச்சிகளில் கருத்தாளர்களாக தங்களால் முடிந்த நிகழ்ச்சிகளை செய்வதாக கூறியுள்ளனர்.

வானியியல் கழகம்

இந்திய வான் இயற்பியல் மையம், பெங்களூருவில் 18,19/11/2011 ஆகிய இரு நாட்கள் நடத்திய பகல் நேர வான் நோக்கு பொருட்கள் தயாரிப்பு பயிற்சி முகாமிற்கு மாவட்டச் செயற்குழு உறுப்பினர் திருமிகு T ஜெயமுருகன் அவர்கள் தமிழ்நாடு அறிவியல் இயக்கம் சார்பாக மாநில அளவில் ஒருவர் மட்டும் கலந்து கொண்டார். அதில் அவர் நமது மாவட்டத்தில் இயங்கி வரும் வானியியல் கழகம் மற்றும் தொலைநோக்கிகளை பரவலாக நமது அறிவியல் இயக்க நண்பர்கள் பயன்படுத்துவது சம்பந்தமாக ஒரு கருத்துரை வழங்கியுள்ளார். பக்கத்திலுள்ள மாநிலத்தின் வானியியல் கருத்தாளார்களின் தொடர்பு கிடைத்துள்ளது. வானவியலைப் பற்றி பயிற்சி முகாம் நடத்தும்போது மாநில, மாவட்ட அளவில் தன்னுடைய அனுபவங்களை பகிர்ந்து கொள்ள ஆவலுடன் உள்ளார். இந்நிகழ்ச்சி அகில இந்திய அளவில் 50 பேர் மட்டும் கலந்து கொண்ட ஒரு நிகழ்ச்சியாகும்.

அறிவியல் நிகழ்ச்சி

14/11/2011 அன்று திருச்சங்கோடு வேலாகவுண்டம்பட்டி கொங்கு மெட்ரிக் பள்ளியில் அறிவியல் எழுத்தாளரும், மாநிலப் பொதுக்குழு உறுப்பினருமான திருமிகு.ஏற்காடு இளங்கோ, அவர்களின் அறிவியல் உரையும், மாவட்ட கருத்தாளர் திருமிகு தில்லைக்கரசி அவர்களின் மந்திரமா தந்திரமா நிகழ்ச்சியும் நடைபெற்றது. அறிவியல் இயக்கத்திற்கு நன்கொடையாக பள்ளியின் சார்பில் ரூ 500 வழங்கப்பட்டது.

துளிர் திறனறிதல் தேர்வு

26/11/2011 அன்று நடைபெற்ற துளிர் திறனறிதல் தேர்வு நமது மாவட்டத்தில் 4 இடத்தில் நடைபெற்றது. 1. ஆத்தூரில் சின்னசாமி அய்யா நடுநிலைப்பள்ளி - மாவட்டப் பொதுகுழு உறுப்பினர் திருமிகு மூர்த்தி, 2 ஊராட்சி ஒன்றிய நடுநிலை பள்ளி கன்னந்தேரி – திருமிகு பார்த்திபன், 3 ஊராட்சி ஒன்றிய நடுநிலை பள்ளி நல்லண்ணம்பட்டி – திருமிகு.மகேந்திரன், 4 கொளத்தூர் நிர்மலா மேல்நிலைப் பள்ளி - திருமிகு ஆண்டனி, திருமிகு.சுப்ரமணி ஆகியோர் தேர்வுகளை நடத்தினர். தமிழ் மூத்தோர் பிரிவில் 52, இளையோர் பிரிவில் 259, ஆங்கிலம் மூத்தோர் பிரிவில் 8, இளையோர் பிரிவில் 20 என மவட்டதில் மொத்தம் 339 பேர் கலந்து கொண்டனர்.

தேர்வு மையத்தில் அனுபவமுள்ளவர்கள் இருந்தால் சிறப்பாக இருக்கும் என வாராந்திர கூட்டதில் ஆலோசனை வழங்க பட்டது.

மாவட்ட அளவில் நிகழ்வை திருமிகு.K.P. சுரேஷ்குமார் ஒருங்கிணைத்தார்.

தேசிய குழந்தைகள் அறிவியல் மாநாடு

10/11/2011 அன்று மாவட்ட தேசிய குழந்தைகள் அறிவியல் மாநாட்டை சிறப்பாக நடத்தி

கொடுத்த காக்கப்பாளையம் நாலெட்ஜ் பொறியியல் கல்லூரிக்கு திருமிகு G சுரேஷ் சென்று நன்றி தெரிவித்து வந்தார்.

19,20/11/2011 ஆகிய நாட்களில் திருமிகு K.P. சுரேஷ்குமார், திருமிகு G சுரேஷ், திருமிகு அருண்குமார், திருமிகு ஜனார்த்தன் மற்றும் திருமிகு மௌலீதரன் ஆகியோர் கலந்து கொண்டு வேலைகளை பகிர்ந்து செய்தனர்.

19,20/11/2011 ஆகிய இரு நாட்கள் ஈரோட்டில் மாணவர்களின் ஆய்வு அறிக்கையை மதிப்பீடு செய்வதற்கும் மற்றும் 24,25&26/11/2011 சத்தியமங்கலம் பண்ணாரி அம்மன் தொழில் நுட்பக் கல்லூரியில் நடைபெற்ற தேசிய குழந்தைகள் அறிவியல் மாநாட்டில் நடுவர்களாகவும் சேலம் மாவட்டத்தில் இருந்து தமிழ்நாடு அரசின் மண்பரிசோதனை மைய வல்லுனர் திருமிகு பாலசுப்ரமணியம், தமிழ்நாடு அரசு பொதுப்பணித்துறை உதவி பொறியாளர் திருமிகு சியமளா மற்றும் சேலம் உருக்காலையில் மெட்டலார்ஜிகள் பொறியாளரும், இளநிலை மேலாளருமாகிய திருமிகு திரவியம் ஆகியோர் கலந்து கொண்டனர். மேலும் பெரியார் பல்கலைகழக ஆராய்ச்சி மாணவர்கள் திருமிகு அனில், திருமிகு சுரேந்திரபாபு மற்றும் திருமிகு சுதாகர் ஆகியோர் நடுவர்களாக கலந்து கொண்டனர்.

24,25/11/2011 ஆகிய இரு நாட்கள் திருமிகு K.P. சுரேஷ்குமார் மற்றும் திருமிகு G சுரேஷ் கலந்து கொண்டு மாநாட்டு வேலைகளை பகிர்ந்து கொண்டனர்.

மாநில அளவிலான தேசிய குழந்தைகள் அறிவியல் மாநாடு ஈரோடு மாவட்டம், சத்தியமங்கலம் பண்ணாரி அம்மன் தொழில் நுட்பக் கல்லூரியில் நவம்பர் மாதம் 24 வியாழன் 25 வெள்ளி மற்றும் 26 சனி ஆகிய தேதிகளில் நடைபெற்றது. சேலம் மாவட்டத்திலிருந்து 7 குழு கலந்து கொண்டது. மாநில அளவில் தேசிய மாநாட்டிற்கு தேர்ந்தெடுக்கப்பட்ட 30 குழுவில் சேலம் உருக்காலை ஸ்ரீவித்யாமந்திர் மெட்ரிக் மேல்நிலைப் பள்ளியை சார்ந்த J.ராகுல் குழுவினர் ஆங்கிலம் முதுநிலைப் பிரிவிலும், ஆத்தூர் திரு சின்னசாமி ஐய்யா உதவிபெறும் நடுநிலைப் பள்ளியை சார்ந்த D.விமலேஸ் குழுவினர் தமிழ் இளநிலைப் பிரிவிலும் தேர்வு பெற்றனர்.

தேசிய குழந்தைகள் அறிவியல் மாநாட்டை மாவட்ட மற்றும் மாநில அளவில் சிறப்பாக நடத்த உதவிய அனைவருக்கும் மாவட்டக் குழுவின் சார்பில் வாழ்த்துக்கள்.

3.கல்வி

25/11/2011 அன்று ஈரோடு மாவட்டம், சத்தியமங்கலம் பண்ணாரி அம்மன் தொழில் நுட்பக்

கல்லூரியில் இரவு 9 மணிக்கு நடைபெற்ற ”சாக்சர் பாரத் திட்டம்” –க்கான திட்டமிடல்

கூட்டத்தில் திருமிகு G சுரேஷ் மற்றும் திருமிகு பழனி ஆகியோர் மாவட்ட கல்வி உபகுழுவிற்காக நமது மாவட்டம் சார்பில் கலந்து கொண்டனர்.

4.அறிவியல் வெளியீடு.

30 அறிவுதென்றல் வாங்கப்பட்டது.

துளிர் 10 ஆண்டு சந்தா மற்றும் 10 உறுப்பினர் ஆண்டு சந்தா அனுப்பப்பட்டது.

மாவட்ட நிர்வாகிகள் 15 பேர் மற்றும் தாரமங்கலம் கிளை நிர்வாகிகள் திருமிகு.சந்தோஷ், ரமேஷ், கார்த்திக், ஸ்ரீனிவாசகர் மற்றும் ராஜேந்திரசோழன் ஆகியோர் துளிர் முகவர்களாக மாவட்டத்தில் மொத்தம் 135 துளிர் விற்பனை செய்கின்றனர்.

மாநில மாநாட்டில் மாவட்ட இணச் செயலாளர் திருமிகு N. கோபால் அவர்களால் ஆர்டர் செய்யபட்ட துணிப்பை வந்துவிட்டது விற்பனைக்கு உள்ளது வேண்டுவோர் அணுகவும்.

புத்தக விற்பனை

நவம்பர் மாத புத்தக விற்பனை இயக்கம்.

ஆத்தூரில் புத்தக விற்பனை செய்ய புத்தகங்கள் 12/11/2011 அன்று திருமிகு.S.அய்யானார், திருமிகு.G.சுரேஷ் மற்றும் திருமிகு நமசிவாயம் அவர்களால் எடுத்து வைக்கபட்டு பட்டியல் தயாரிக்கப்பட்டது.

ஆத்தூரில் 14,16/11/2011 ஆகிய இரு நாட்கள் ஆத்தூர் கிளை நூலகத்திலும், 15/11/2011 அன்று பாரதியார் மேல்நிலைப் பள்ளியிலும் மாவட்டச் செயற்குழு உறுப்பினர் திருமிகு.நமசிவாயம் அவர்களால் புத்தக விற்பனை ரூ.5397 செய்யப்பட்டது. இப்புத்தக விற்பனைக்கு ஆத்தூரில் கிளைச் செயலாளர் திருமிகு சீனிவாசன். கிளைத் தலைவர் திருமிகு.அர்த்தநாரி மற்றும் மாவட்டச் செயற்குழு உறுப்பினர்கள் பழனி உள்ளிட்ட கிளை நண்பர்கள் வேண்டிய ஏற்பாடுகளையும், உதவிகளையும் செய்துள்ளனர்.

துளிர் திறனறிதல் தேர்வு நடைபெற்ற கன்னந்தேரியில் மாவட்டச் செயற்குழு உறுப்பினர் திருமிகு நமசிவாயம் அவர்களால் புத்தக விற்பனை ரூ 1592, நல்லண்ணம்பட்டியில் மாவட்டச் செயற்குழு உறுப்பினர் திருமிகு S.அய்யானார் அவர்களால் புத்தக விற்பனை ரூ430 செய்யப்பட்டது.

5.சமம்

6.வளர்ச்சி

7.இதர

06/11/2011 அன்று முழு நாளும் மாவட்ட அலுவலகம் திருமிகு S.அய்யானார், திருமிகு.M..கலையரசன் மற்றும் திருமிகு G.சுரேஷ் அவர்களால் சுத்தம் செய்யபட்டது.

தொலைநோக்கி வாங்குவதற்கு சென்னை கோமஸ்கடைக்கு முன்பணம் ரூ 10000 வரைவோலை அனுப்பபட்டது.

10/11/2011 அன்று Department of Science and Technelgy நடத்திய Inspire அறிவியல் கண்காட்சியில் நடுவர்களாக அறிவியல் இயக்கம் சார்பாக திருமிகு திரவியம், திருமிகு பெலிக்ஸ், திருமிகு சதிஸ் மற்றும் மாவட்ட இணச் செயலாளர் திருமிகு.D.திருநாவுக்கரசு ஆகியோர் கலந்து கொண்டனர்.

அடுத்த மாநில செயற்குழு கூட்டம் 7,8/1/2012 ஆகிய இரு நாட்கள் சேலத்தில் நடத்த மாவட்ட நிர்வாகக்குழு கூட்டத்தில் முடிவு எடுக்கப்பட்டது. அம்முடிவின்படி சேலம் உருக்காலையின் திருமண மண்டபத்தில் நடத்துவதற்கு உருக்காலையின் பொது மேலாளரை மோகன் நகர் கிளை தலவர் திருமிகு சர்மா, கிளைச் செயலாளர் திருமிகு மீனாட்சி சுந்திரம்

மற்றும் திருமிகு.K.P. சுரேஷ்குமார் ஆகியோர் சந்தித்து அனுமதி பெற்றனர்.

டிசம்பர் மாதம் செய்ய திட்டமிட்ட வேலைகள்

தமிழகத்தின் தென்மாவட்டங்களின் புவி அமைப்பை ஆய்வு செய்ய ஜெர்மன் விஞ்ஞானி திருமிகு கெயில் அவர்கள் வந்துள்ளார். அவரை கொண்டு கல்லூரி மற்றும் அறிவியல் இயக்க உறுப்பினர்களுக்கான நிகழ்ச்சி நடத்தவதற்கு மாநில செயற்குழு உறுப்பினர் திருமிகு P.சகஸ்ரநாமம் அவர்களை தொடர்பு கொள்ளவும்.

நல்லண்ணம்பட்டி கிளை கூட்டம் விரைவில் நடத்துவதாக கிளை தலைவர் திருமிகு செங்கோடன் அவர்கள் தெரிவித்துள்ளார். தாலுக்கா பொறுப்பாளர் வேண்டிய உதவிகளை செய்யவும்.

இரயிலில் புத்தக விற்பனை செய்ய திட்டமிடப்பட்ட்து பொறுப்பு திருமிகு.கோபால்.

அக்டோபர் மாதம் திட்டமிடப்பட்டு செய்யாமல் உள்ள கீழ்கண்ட வேலைகளை திட்டமிட்டு செயல்படுத்துவது.

உபகுழுக்கள் மற்றும் தாலுக்கா குழுக்கள் கூட்டம் நடத்துவது.

பெரியார் பல்கலை கழகத்தில் கிளை மற்றும் துளிர் இல்லம் துவக்குவது. பொறுப்பு திருமிகு P.சகஸ்ரநாமம்.

மரக்கன்று நடுவது. பொறுப்பு திருமிகு K.P. சுரேஷ்குமார்.

ஜேஸிஸ் உடன் விஜயகுமார் உடன் இணைந்து நிகழ்ச்சி நடத்துவது. பொறுப்பு திருமிகு.K.P. சுரேஷ்குமார்.

அறிவியல் இயக்க உறுப்பினர்களுக்கான புத்தக வாசிப்பு முகாம் நடத்துவது. திருமிகு பாலசரவணன், திருமிகு லால், திருமிகு சசிகலா ஆகியோர் ஒருங்கிணைப்பில் சேலம் நகரக் கிளை உதவியுடன் நடத்துவது. ”ஆளுக்கொருக்கிணறு” என்ற புத்தகம் வாசிக்க எடுத்து கொள்வது.

சென்னையில் வேலை செய்யும் தங்கள் குழந்தைகள் அல்லது தெரிந்தவர்களின் பெயர் கைப்பேசி மற்றும் முகவரிகளை என்னிடம் தெரிவிக்கும்படிக் கேட்டுக் கொள்கிறேன்.

அறிவியல் இயக்க நிகழ்ச்சிகளின் திட்டமிடல் மற்றும் பங்கேற்பில் நிர்வாக்குழு, செயற்குழு மற்றும் பொதுகுழு உறுப்பினர்கள் ஆர்வத்துடன் பங்கேற்று இயக்க வளர்ச்சிக்கு உதவும்படிக் கேட்டு கொள்கிறேன்.

கிளைச் செயலாளர்கள் மற்றும் தாலுக்கா பொறுப்பாளர்கள் மாதம் ஒரு முறையேனும் கிளைக் கூட்டம் நடத்தி கிளை உறுப்பினர்களுக்கு மாத அறிக்கையை தெரிவிக்கும்படி அன்புடன் கேட்டு கொள்கிறேன்.

அன்புடன்

வெ.ராமமூர்த்தி - 94864 86755

மாவட்ட செயலாளர்,

சேலம் மாவட்டம்.

டிசம்பர் 10: முழு சந்திரகிரகணம்.

2011-12-08T17:53:00.000+05:30

தமிழகத்தில் நிலவு மாலை 5.35க்கு உதிக்கும்போது அரிநிழலிற்குள் சென்றிருக்கும். கருநிலழிற்குள் (Umbra) மாலை

06.14க்கு செல்ல ஆரம்பித்து 7.37க்கு முழுமையாக சென்றுவிடும். பின்னர் 8.27க்கு கருநிழலிருந்து விலக ஆரமித்து 9.46க்கு முழுமையாக விலகிவிடும். அரிநிலழலிருந்து (penumbra) 10.59க்கு விலகுவதை கண்டுணர்வது கடினம்.

அன்புடன்

சே. பார்த்தசாரதி

சர்வதேச வேதியியல் ஆண்டை முன்னிட்டு விஞ்ஞான் பிரச்சார் மற்றும் தமிழ்நாடு அறிவியல் இயக்கமும் சேர்ந்து மதுரை காமராஜர் பல்கலைகழகத்தில் 09,10 & 11 நவம்பரில் நடைபெற்ற பயிற்சி முகாம்

2011-11-28T23:25:00.002+05:30

சர்வதேச வேதியியல் ஆண்டை முன்னிட்டு விஞ்ஞான் பிரச்சார் மற்றும் தமிழ்நாடு அறிவியல் இயக்கமும் சேர்ந்து மதுரை காமராஜர் பல்கலைகழகத்தில் 09,10 & 11 நவம்பரில் நடைபெற்ற பயிற்சி முகாமிற்கு சேலம் மாவட்டத்தின் சார்பாக திருமிகு டோமினிக், திருமிகு ராஜேந்திரசோழன், திருமிகு கணபதி ராணி மற்றும் திருமிகு சகிராபேகம் ஆகிய ஆசிரியர்கள் கலந்துக்கொண்டனர்